Ovras ecclesiasticas ed organisaziuns da la missiun

Partenaris fidaivels

L’amur da Dieu senza resalvas envers ils umans dat a l'uman la capacitad d’amar senza resalvas er el ses proxims. “Sco ch'il corp senza il spiert è mort, uschia è morta er la cretta senz’ovras.” (Jacobus 2, 26). La baselgia na po betg esser baselgia da Jesus Cristus sch’ella na viva betg lasuenter e na dat betg testimonianza da quai. Perquai han las baselgias en il gir dals tschientaners fundà organisaziuns che han per mira speziala da porscher agid, speranza ed in avegnir. En la Baselgia evangelica-refurmada da la Svizra BERS èn quai surtut quatter organisaziuns: Agid da las Baselgias evangelicas svizras ABES/HEKS, Paun per tuts, Mission 21 e DM – échange et mission.

Ovras ecclesiasticas

ABES/HEKS e Paun per tuts èn fundaziuns da la BERS. Il Cussegl sco er la sinoda da las BERS tutgan tar ils organs da las fundaziuns ABES/HEKS e Paun per tuts. La radunanza da delegadas e delegads elegia ils commembers dals cussegls da fundaziun, ed in commember dal Cussegl da la BERS è ex officio commember en mintga cussegl da fundaziun.

Organisaziuns da la missiun

La BERS collavura stretgamain cun las duas organisaziuns da la missiun svizras: Mission 21 e DM-échange et mission. Entant che DM-échange et mission vegn purtada da las baselgias commembras da lingua franzosa da la BERS, stattan davos Mission 21 pliras societads da missiun senza ina participaziun directa da las baselgias.

Barat davart la strategia

Ina plattafurma cuminaivla pussibilitescha in barat pli profund davart la strategia da las organisaziuns che lavuran sin il champ da la missiun. En occasiun da las sinodas stgaffescha ella en pli ina plattafurma da discussiun davart ils programs da Mission 21 e DM-échange et mission cun las baselgias commembras da la BERS, ed ella rinforza il sentiment da responsabladad da las baselgias per las organisaziuns da missiun entras l’incassament d'ina contribuziun da basa destinada per ellas.

Conferenza per contacts externs

Ils responsabels operaziunals per ils contacts externs en las ovras ecclesiasticas, las organisaziuns da missiun sco er la BERS sa scuntran ina giada l’onn per infurmar vicendaivlamain davart lur programs e per coordinar ensemen, en il rom da la conferenza, champs da collavuraziun che fissan giavischabels e pussaivels per ils contacts externs.