Gottfried Locher ha presidià il Cussegl dapi l’onn 2011. En ses temp d’uffizi datti novaziuns impurtantas, surtut la nova constituziun che ha dà la basa per la Baselgia evangelica refurmada da la Svizra BERS. Envers las autoritads federalas e l’administraziun sco er en il dialog ecumenic ed interreligius è la BERS oz bain posiziunada. Sco president da la Cuminanza da baselgias evangelicas en Europa CBEE è Gottfried Locher s’engaschà er en il context internaziunal.
Il presidi è mo pussibel cun plaina abilitad d’agir
L’abilitad d’agir dal president era dapi in pèr emnas limitada pervia d’in affar ch’il Cussegl è vegnì a savair ils 13 d’avrigl e che dapi alura vegn tractà intensivamain. Ils fatgs n’èn betg clers e cumprovads e vegnan ussa sclerids. E tuttina: En vista a las sfidas actualas da la BERS sco er la forza creativa limitada sco president, ha Gottfried Locher en il discurs cun il Cussegl decis, da sa retrair da ses uffizi per immediat. Tenor la veglia da Gottfried Locher duai ina discussiun enturn sia persuna betg render pli grev la lavur da la Baselgia evangelica refurmada da la Svizra. Cun sia demissiun vul Gottfried Locher metter in accent, per che tut las forzas sa possian concentrar al svilup da la baselgia. En ina brev al president sinodal ha Gottfried Locher communitgà oz sia demissiun da ses uffizi.
Il Cussegl da la BERS respecta quest pass da Gottfried Locher ed engrazia per ses merits a favur da la Baselgia evangelica refurmada da la Svizra.
Entaifer las BERS n’è l’elavuraziun da l’affar betg finida
L’elavuraziun da l’affar entaifer la BERS cuntinuescha. Il Cussegl – en quel mument consistind da Esther Gaillard, Ruth Pfister, Ulrich Knoepfel, Pierre-Philippe Blaser e Daniel Reuter – ha gia als 17 d’avrigl 2020 decis che quests fatgs cumplexs duain vegnir examinads independentamain tras in’instanza externa. Quell’instanza è entant vegnida nominada. En quest reguard è il Cussegl en contact cun ils presidis da la sinoda e da la cumissiun da gestiun per coordinar ils divers scleriments. Suenter la sortida d’ina commembra dal Cussegl e dal president dal Cussegl, vul la BERS avair clerezza per pudair trair las dretgas conclusiuns da quai ch’è capità e per pudair finalmain ir vinavant cun novas forzas.
Enfin a la reoccupaziun dal presidi vegnan la vicepresidenta Esther Gaillard ed il vicepresident Daniel Reuter a manar la gestiun. Il Cussegl ed il secretariat garanteschan ina gestiun speditiva.